AÐGENGI

Sýningin Ferðalok ber heiti eins ljóða skáldsins Jónasar Hallgrímssonar. Hún fjallar um manninn, skáldið og náttúrufræðinginn Jónas Hallgrímsson og er sett upp í tilefni 200 ára fæðingarafmælis hans en Jónas fæddist á Hrauni í Öxnadal 16. nóvember árið 1807. Jónasar Hallgrímssonar er jafnan minnst sem listaskáldsins góða. Hann var jafnframt með lærðustu mönnum síns tíma hér á landi. Auk lokaprófs í náttúruvísindum hafði hann próf frá Bessastöðum, studiosus theologiæ, sem gerði hann gjaldgengan til prestsembættis á Íslandi, og candidatus philosophiæ próf með ágætiseinkunn frá Hafnarháskóla. Jónas var einn stofnenda tímaritsins Fjölnis en þau skrif og þýðingar sem þar birtust áttu mikinn þátt í endurnýjun íslensks ritmáls og höfðu langvinn áhrif á menningar- og stjórnmálalíf Íslendinga. Sýningin er gerð að frumkvæði menntamálaráðuneytisins sem skipaði nefnd til að undirbúa afmælishald á árinu. Handrit, myndir, munir og önnur sýningargögn eru frá ýmsum söfnum hérlendis og í Danmörku og hafa sum hver ekki komið fyrir almennings sjónir áður.