AÐGENGI

Minjasafnið Bustarfell er í Hofsárdal, 30 km frá þjóðvegi 1. Þjónustuhús er við safnið og hægt að kaupa veitingar í Hjáleigunni, kaffihúsi. Bustarfell í Vopnafirði er einn af fegurstu og best varðveittu torfbæjum á Íslandi. Meginhluti bæjarhúsanna er allt frá 1770 og þar er hægt að sjá hvernig búskaparhættir og lífsstíll hafa breyst með árunum m.a. í eldhúsunum í bænum. Á Bustarfelli hefur sama ættin, Bustarfellsættin, búið síðan 1532 og bjó í gamla bænum þar til 1966. Bustarfell er minjasafn Vopnafjarðar. Bærinn er innarlega í Hofsárdal og stendur undir samnefndu felli. Í bænum er varðveittur fjöldi muna frá ýmsum tímum en einhver frægasti gripur sem tengist bænum, Álfkonudúkurinn, er geymdur á Þjóðminjasafninu. Álfkona sem bjó í svokölluðum Álfkonusteini í grennd við bæinn, er sögð hafa gefið konu á Bustarfelli dúkinn að launum fyrir hjálp í barnsnauð. Svo mikið er víst að hann er ólíkur öllu sem þekkt er úr íslenskum mannheimum þess tíma.